ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហាញនូវរូបភាពមួយសន្លឹកដែលបានថតក្នុងឆ្នាំ១៩៧៨ ពេលដែលសម្ដេចចុះពិនិត្យទ័ពមុនវ៉ៃខ្មែរក្រហម៦ខែ។
ក្នុងរូបថតនេះសម្ដេចតេជោ ហ៊ុន សែន ពាក់វ៉ែនតា សក់នៅខ្មៅ ក្នុងសំលៀកបំពាក់អាវកឌុប បង់ក្រមា ស្លៀកខោជើងវែងយ៉ាងសមសួន បោះជំហានដើរក្នុងព្រៃមួយកន្លែង។
សម្ដេចតេជោ ហ៊ុន សែន បានសរសេរនៅលើបណ្ដាញសង្គមថា៖ «រូបថតដ៏កម្រដែលទើបរកឃើញដែលនេះជាដំណើរត្រួតពិនិត្យភូមិសាស្រ្តដើម្បីហ្វឹកហ្វឺនកងវរសេនាតូចលេខ២៤៦ (24/6/1978) នៃកងកម្លាំងប្រដាប់អាវុធសាមគ្គីសង្រ្គោះជាតិកម្ពុជាដើម្បីវាយរំលំរបបប្រល័យពូជសាសន៍ ប៉ុល ពត»។
នាយករដ្ឋមន្ត្រីកម្ពុជាបច្ចុប្បន្ន សម្ដេចតេជោ ហ៊ុន សែន បានយកជីវិតធ្វើដើមទុនដើម្បីតស៊ូរំដោះប្រជាជនកម្ពុជា ចេញពីរបបប្រល័យពូជសាសន៍នៅថ្ងៃទី២០ ខែមិថុនា ឆ្នាំ១៩៧៧ រត់ទៅសុំជំនួយពីប្រទេសវៀតណាម។ ដោយសារការសម្រេចចិត្តដ៏ត្រឹមត្រូវនេះហើយទើបសម្ដេចអាចកសាងកម្លាំងយុទ្ធជនខ្មែរ ក្រោមជំនួយវៀតណាមបានបើកការវាយប្រហារលើខ្មែរក្រហមនៅថ្ងៃទី២៥ ខែធ្នូ ឆ្នាំ១៩៧៨ ប្រើពេល១៣ថ្ងៃ វ៉ៃដល់រាជធានីភ្នំពេញ ថ្ងៃទី៧ ខែមករា ឆ្នាំ១៩៧៩ បញ្ចប់របបដឹកនាំខ្មៅងងឹតរបស់ ប៉ុល ពត ពីកម្ពុជា និងបន្តដឹកនាំកម្ពុជាដល់បច្ចុប្បន្ន៕